Paralu Ditiru

“Iko paralu bana ditiru mah Mak!” Kato Uncu Labai ka konco palangkinnyo. “Apo Ncu?” Tanyo Mak Pono nio tau. “Anak-anak wajib pakai helem wakatu naiak onda,” jawek Uncu sambia mampacaliak-an barita di Koran ‘Singgalang’ nan bajudul ‘Anak-anak Wajib Menggunakan Helm’.

“Salamo ko den caliak buliah dikatoan indak ado anak-anak nan diagiah helem dek urang tuonyo doh,” sambuang Mak Pono.

“Makonyo paralu diubah caro bantuak itu. Den juo satuju anak-anak diagiah helem kalau naiak onda. Karano, kapalo anak-anak jauah labiah lunak dari kapalo awak nan lah tuo-tuo ko. Saumpamo karambia, kapalo anak-anak adolah karambia mudo, kalau jatuah murah pacah. Tapi kapalo awak ko samo jo karambia masak, balambin bana dari tampek nan tinggi indak murah pacah,” kecek Uncu.

“Batua mah Ncu. Salamo ko banyak di antaro awak nan salah atau katoanlah sasek aia. Awak lai pakai helem mambao motor, tapi anak-anak dipabiakan sajo indak bahelem,” kecek Angah Piyan pulo.

“Nan paliang babayo tu, sudahlah indak pakai helem, anak-anak labiah banyak diduduak-an di muko sakali. Saandainyo buruak disabuik, tajadi kacalakaan, anak-anak tu nan labiah daulu kanai,” kato Tan Baro.

“Jadi, awak ko banyak nan salah salamo ko. Mustinyo anak nan paralu dilinduangi labiah dulu,” sambuang Uncu.

“Den raso indak itu se kasalahan awak salamo ko doh Ncu. Malatak-an anak-anak di muko sakali katiko baonda, juo babayo untuak kasehatannyo. Bara kancang angin nan lansuang ka anak, tapi anak-anak indak diagiah jaket,” kato Angah baliak.

“Ndeeeh, iyo yo. Sacaro indak disadari awak ko lah maniayo anak-anak mah ndak,” kato Mak Pono.
“Makonyo iko paralu awak tiru. Kalau mambao anak baonda, musti diagiah pulo palengkapan. Harus pakai jaket, pakai helem dan juo pakai masker anak-anak tu,” kecek Uncu.

“Kalau baonda sakaluarga, sarancaknyo anak-anak-anak dilatak-an di tangah. Di muko itu babayo mah. Salain rawan kacalakaan, juo rawan untuak kasehatan anak. Bara angin nan disonsongnyo. Baitu juo abu atau asok dari kandaraan,” kecek Angah.

“Nan paliang aman tu bao anak jo oto!” Semba Kari Garejoh.

“Kok lai ado oto, tantu iyo rancak. Kok mode kami-kami ko baa? Ijankan oto, oto-oto se indak punyo,” baleh Mak Pono.

“Buek jo batang pisang Mak!” Sambuang Kari.

“Kok lah masuak Kari, bisa matah karak deknyo mah,” runguik Uncu sambia manggawik kapalo.

“Yo, banyak bana modal untuak baonda tu,” kecek Kari baliak.

“Kalau nio salamaik iyo musti bamodal Ri. Onda lai tabali dek Kari, tapi helem, jaket atau masker untuak anak, indak talok mambali. Itu samo se Kari jo mambunuah anak mah. Bisuak ko bia diusul ka anggota de-pe-er nan baru, saandainyo ado anak-anak maningga dek ulah kacalakaan dan indak pakai helem, harus diagiah pasal pambunuahan ka urang tuonyo. Baa pandapek Uncu?” Kato Tan Baro.
“Suwai Tan!” Tageh jawaban Uncu. (eSPe St.Soeleman)