Hari tu, 21 Februari 1958, kami sadang istirahat Kuliah di B-I Sejarah Bukittinggi. Latak Gaduang B-I Sejarah tu di ateh Jalan Kayu Ramang di sabalah ka Selatan Istana Wakil Presiden, dakek sabalah ka Timur Kantua Pengadilan Negeri Bukittinggi. Wakatu tu ambo pun tingga di Jalan Kayu Ramang, sabalah Famili Foto Studio di subarang jalan dari Gaduang B-I tu.
Kami sadang maota-ota jo kawan-kawan mandiskusikan suasana sakatiko. Takana di ambo wakatu itu, kito ka mamasuaki Parang Saudara karano saminggu sabalun tu (15 Februari 1958) lah diumumkan PRRI sabagai urutan konsekwensi dari Ultimatum Dewan Banteng 10 Februari 1958. Ambo kecekkan ka Pak Sjamnir salah saurang dosen kami wakatu itu, mungkinkah awak ka jadi Korea Ka-2? Baliau manjawab, indak! Korea Ka-2 ka tajadi di Vietnam. Ramalan baliau memang batua, jauah kamudian memang Parang Vietnam nan tajadi. Ambo kagum sampai kini mangana kecek Pak Sjamnir wakatu itu. (Pak Sjamnir, baturuik-turuik sajak 1949-50 sampai 1958 tu bekas Kepala SMP Tanjuang Alam, Kepala Inspektur SMP Sumatera Tengah, dan Dosen B-I Sejarah Bukittinggi. Kini urang gaek kito di Banduang dan masih sehat).
Nah, sadang maota-ota tu, hari rancak, udaro barasiah sadang manjalang luhua, tibo-tibo mancogok duo kapa tabang, jaleh tampak di kami arahnyo dari antaro Singgalang jo Gunuang Marapi saroman dari Pandai Sikek. Sabanta tujuo lah dakek ka kami saroman dari arah Guguak Tinggi di Ateh Ngarai manuju ka arah kami. Kecek ambo, sambia bagarah, aaa malawan jo lah ka Sukarno, ko ha, lah tibo anak buahnyo! Sabanta kapatabang tu marauang-rauang lah tadanga dantuman bom, tembakan-tembakan dari udaro. Ruponyo sender RRI di Garegeh tu nan dibaenyo.
Kawan-kawan ambo lah tiarap di balakang Gaduang kami dakek tabiang di bawah Istana tu. Ambo tagak basanda ka dindiang di suduik sabalah ka timur gaduang tu macaliak kawan-kawan sadang tiarap. Takana dek ambo sasudah tu Siti Atmi (pangilan Timi, anak Pak A.Rivai Yogi) nan suko bagahgah jo dialek Piaman, mangecekkan ka ambo sambia manggegek lutuik ee, “Tapanca kaghaia den!” keceknyo sambia tabighunguik, maahapui-hapuih aia mato jo
salemonyo. Masih tabayang Timi sampai kini, antah dimaa lah inyo kini …
Anak-anak SR-8 tu pulang dari Sikola badederan di Jalan Kayu Ramang tu, sasudah tiarap pulo , mareka balari-lari pulang barombongan sambia batangihan ..
Sudah tu panjang Carito Sejarah Sumatera Barat (1958-61), ado nan lah ditabikkan caritonyo, tapi banyak nan alun … Oral tradition tu paralu digali untuak maso kamudian…
Baiak Gaduang B-I Sejarah, maupun Gaduang Pengadilan Negeri Bukittinggi dan SR-8 tu indak ado lai kini (2005) , lah dilaleh dan diganti jadi Hotel Novotel. Sasudah Bukittinggi diduduki tantara Pusek, Istana Wakil Presiden Hatta, diubah namo manjadi Gedung Tri Arga. Pasti Sukarno indak suko jo namo Istana Hatta tu (Saroman pulo Bukittinggi sabagai Ibu Kota PDRI, Pemerintah Darurat Republik Indonesia, waktu Agressi ka-2 1948-49 jarang disabuik dalam pentas Sejarah Nasional). Jalan Kampuang Cino barubah manjadi Jl A. Yani, dll.
Akhia-akhia ko, 2003 jo 2004, tiok ambo pai baranang ka swimming pool di Novotel kalau pulang, ambo taruih mangana, di bawah swimming Pool ko panah ado Gaduang B-I Sejarah. Gaduang Novotel kini tu adolah Kantua Pangadilan Negeri Bukittinggi dahulunyo. Tiok ambo baranang di Hotel Pusako di Simpang Limau tu takana pulo ado sender RRI Bukittinggi di sinan nan ditembaki kapatabang tu badagham-dagham tanggal 21 Februari 1958 tu. Pangana jauah ka Latar Bulakang Sejarah Minang diari Masa ke Masa…
Sasudah baranang di Hotel Pusako, kadang-kadang ambo singgah ka rumah Kanda Chairrul Abidin di Anak Aia, mangana kenangan Sejarah Minangkabau. Kanda Chairul Abidin adolah Senior ambo di ST-2 Bukittinggi (1956-58 tu) wakatu kami maaja di sinan di Jalan Lambau. Kanda Chairul adolah adiak dari Pak M. Rasjid Manggis Dt.Radjo Penghulu, dan ayahanda dari Angku Dr.Chairil Abidin nan panah juo jadi anggota Rantaunet, Lapau kito. Dari baliau masih banyak kenangan Kota Bukittinggi dengan latar bulakang Sejarah Minangkabau …
Salam,
–MakNgah
Tidak ada komentar:
Posting Komentar