Adab Jo Taratik Makan

NAN PARTAMO
     Ado adab/caro makan (baradaik) di nagari awak nan kini alah samakin langka dikarajoan urang, makan basamo katiko baralek sacaro adaik, jo caro bajamba. Makan basamo, balimo sampai baranam urang maadok-i ciek piriang gadang. Sacaro sederhana nampak bahaso urusanno indak labiah dari 'makan basamo', tapi dalam kanyataanno banyak aturan-aturan nan musti dikatahui dek urang-urang nan sato makan, sabab kalau sasaurang salah, awakno kadapek cap indak bataratik, atau labiah jauah, indak baradaik.

     Makan bajamba samo ado dikarajoan rombongan laki-laki ataupun urang padusi. Untuak laki-laki, katiko makan alah sabana ka dimuloi, sasudah salasai pasambahan untuak mampabasoan urang nan adang adok dalam sidang karapatan untuak ka samo makan, mako si pangka, atau nan mawakili tuan rumah ditiok jamba, mamasuak-an samba alias lauak pauak nan dilatak-an ditangah-tangah piriang gadang nan alah baisi nasi. Piriang gadangko ado kalono dilatak-an di ateh dulang tapi bisa juo indak baaleh jo dulang. Malatak-an sambako musti arif bijaksano supayo jaan sampai latak samba cako tampak kurang adia, jadi musti sabana di tangah. Di masiang-masiang jamba duduak ipa jo bisan, si pangka jo si alek, ado nan tuo, ado nan dituokan, sainggo proses makan basamo sabana musti dijago supayo tatap dalam kaadaan bataratik. Irama suok turun naiak musti basilambek, indak buliah karocoh pocoh, musti nanti manantian. Nan disuok hanyolah nan diadok-an awak masiang-masiang, jadi indak buliah malintehi 'panyuok-an' urang di suok kida awak. Katiko mamuloi indak nampak bana sia nan paliang daulu, sabab mambasuah tangan sabalun ka makan buliah samo sarangkek. Tapi ka baranti ado aturan nan musti dijago, indak buliah nan mudo daulu mambasuah tangan. Walaupun awakno alah kanyang, bagianno alah abih, ano musti manantian sampai nan labiah tuo atau nan dituo-an salasai sudah itu mambasuah tangan labiah daulu, baitu taratikno. Makan bisa dilaluan sambia maota-ota ketek, tapi musti dijago pulo kato-katojo caro mangecek, jaan sampai bakapantiangan nasi kalua dari muncuang. Indak bataratik namono kalau makan disaratoi jo galak takakah-kakah, sabab jo caro ikopun amuah pulo tabosek nasi dari muncuang kalua.

     Makan indak buliah barimah atau taserak nasi kalua, sabab nan sarupo iko indak kameh namono alias mubazia. Kalau ka ditambuah-an nasi, apo lai tambuahan nan nomor sakian, musti samupakaik urang sajamba. Kalau urang alah sabana manulak, bukan lai dek babaso, jaan dipasoan juo supayo jaan sampai basiso. Basisoko indak buliah. Jadi fihak si pangka (nan kamanambuah-an nasi) iyo bana harus pandai maakuak-an.

     Bajamba makan nasi, bajamba pulo 'minun kawa' sasudah itu. Jamba minun kawako tadiri dari katan, jo ajik, jo kalamai, jo pinyaram nan dilatak-an ditangah-tangah. Sabalun ka minun kawa ado pasambahan saketek dulu, mamintak si alek malakek-an parabuang, dek kini musim paujan, baitu jano.

     Romboangan padusi baitu juo carono. Nan babedo hanyolah di caro duduak, sabab urang padusi duduak basimpuah, samantaro laki-laki duduak baselo. Seloko indak buliah lapeh sajak mulo duduak sampai sabana tagak maurak selo, sasudah salasai makan jo minum kawa, sasudah salasai jo pasambahan mintak kato katurun, nan lamono bisa jadi sampai ampek jam (panah ambo alami du). Antah baa lo lah carono, alun panah nampak urang nan indak pandai tagak sasudah duduak baselo salomo itu doh. Paliang-paliang agak sapiradan kaki tu sabanta, ta tengkak-tengkak saketek, sudah tu aman sajo.

     Di kampuang ambo, dulu ambo paratian ado sabagian kaum ibu-ibuko nan mamasuak-an nasi ka muncuang jo caro 'baambuangan'. Nasi tu di 'pamainan' mareka jo jari, sabagian ado nan di 'amia-amia' di tangan babarapo saat sabalun diambuangan ka muncuang. Atraksi nan sabanano cukuik hebaik sabab indak ado nan taserak nasi tu doh.

     Baiak dikalompok urang laki-laki ataupun urang padusi, biasono anak-anak indak disatoan sajamba jo urang tuo-tuo doh. Anak-anak ko diagiah sajo piriang surang, supayo indak manggaduah.


NAN KA DUO
     Ado apak kawan ambo saisuak di Banduang biaso maajai kami. Kalau kalian makan di meja makan, di undangan atau di rumah urang, mamakai sendok jo garapu, musti kalian paratian bana, jaan sampai babunyi badanciang-danciang sendok jo garapu tu di piriang. Kalau makanan bakuah saumpamo sup, indak buliah babunyi 'sarupuik'no. Makan indak buliah mancapak-capak. Indak buliah mairuik-iruik salemo kok nyampang tabik salemo dek makan kapadehan. Indak buliah malapehan sindao gadang. Kalau alah sudah makan, sendok jo garapu musti ditungkuik-an latakno basisian dipiriang, itu ka tando bahaso awak alah sudah makan indak ka batambuah lai. Baitu jano baliau maajai kami. Caro-caroko tantu sajo bukan caro baradaik di nagari awak, tapi caro-caro'taratik' urang Bulando. Sabagian lai sasuai ambo, lai juo ambo pagunoan kalau ambo makan diundangan urang caro makan duduak di meja bakurisi, kacuali malatakan sendok batungkuik-an tu.

     Sasudah bakarajo jo urang Parancih, sakali samaso pai (tapaso) mamanuahi undangan makan malam mareka, nan kudian-kudian ko samakin acok ambo tulak. Ambo tulak sabab indak lanteh angan lai duduak sameja jo urang minum khamar, tau ambo baso sato badoso awak walau hanyo sakadar sato duduak mangawani sajo. Katiko pai tapaso tu (dulu) ambo usaoan untuak samo duduak sameja jo urang nan indak minum khamar tu. Makan mampagunoan pisau jo garapu. Pisau disuok, garapu dikida. Dek makan jo tangan kidako adolah caro makan setan (hadits Rasulullah SAW) mako ambo mamotong-motong makanan jo pisau, sudah itu maistirahatkan pisau di tapi piriang, mamacik-an garapu jo tangan suok. Lai alun panah nan managua atau nan batanyo lai doh.

     Kalau urang Parancih iyo sabana baunyai-unyai makan ko, sabana barapi-rapi ota, langkok jo galak takekeh-kekeh bagai, katiko ado carito lucu. Nan indak basamangaik bana awak mancaliak katiko ado (bahkan sangat umum) nan malansiang salemo ka serbet jo bunyi nan sabana mengezutkan. Di kalangan mareka itu bukanlah tabu, bukanlah indak sopan. Awak nan duduak dakek mareka iyo janiah-janiah ayia liyua dibuekno.

     Undangan nan biasono pukuah satangah salapan malam, dimuloi jo minum-minum sambia maota-ota. Mareka minum sampanye, awak buliah mintak jus limau misalno. Tagak sambia maota-ota ka ilia ka mudiak. Iko alah kurang manyanangan diambo. Pukuah satangah sapuluah baru muloi makan. Duduak dikurisi meja-meja bulek untuak salapan urang sameja, atau ado juo di meja panjang bahadok-hadokan. Makan baunyai-unyaiko, balapih-lapih nan dimakan, makanan pambukak, makanan utamu, ado pulo desert bisa labiah dari ciek, ado pulo makan-makan keju (ado nan busuak sangaik bagai baunno), dan sabagaino, dan sabagaino nan masiang-masiangno tu sabana lamo, sainggo panah bakasudahan pukuah duo pagi, diselingi jo hota nan indak bakarunciangan amek. Nan cilakono, manuruik tatakrama mareka, jamuan ko alun salasai kalau alun di tutuik jo kopi atau teh. Jadi kalau alun ditutuik jo minum kopi alun buliah awak lai mintak ijin nak daulu, baitu pulo konon. Salamo minum kopiko duduak alah buliah bebas, biasono tuan rumah bakuliliang pulo malawan tamu-tamu maota agak saketek surang, kasampatan untuak saliang manggajobohan antaro tuan rumah jo tamu. Iyolah banyak sesono mahadiri jamuan sarupo itu, itu mako maleh ambo hadir.


NAN KA TIGO
     Mandatangi undangan baralek alah ado sajak saisuak, baiak di kampuang maupun di kota. Di kampuang-kampuang dulu undanganko disampai-an jo mambao / maantaan siriah di kalangan urang padusi, manjalehan pabilo alek tu kadiadoan, alek apo nan dimukasuik (alek parnikahan, alek katam kaji, alek mangaqiqah-an anak, alek manaiak-i rumah).

     Di lua acara adaik saumpamo katiko alek nikah, urang nan diundang 'buliah' datang bilo sajo. Datang baralek pabilo wakatu sajoko biasono disabuik 'pai makan'. Sainggono alek di kampuang saisuak tu baunyai-unyai, baari-ari. Kok nyampang alektu alek parnikahan, kadang-kadang, lah pai anak daro dibaono marantau dek marapulai, urang datang juo lai baru, pai makan ko. Kalau nan datangno alah takudianko bana, tantu tapaso manantian urang batanak jo manggulai baliak dulu mangko ka dapek makan.

     Makan di rumah urang baralek, duduak di lapiak, di lantai, nan baaleh jo siparah makan. Duduak malingka maadoki juadah di ateh kain siparah tu. Nan laki-laki baselo, nan padusi basimpuah. Diateh siparah makanko basusun samba-samba, langkok sakali jo paminun kawa, katan jo ajik, jo kalamai, jo pinyaram, jo kue talam, disusun tingkah batingkah. Juadah nan dilatak-an sarupo iko biaso disabuik sabagai jamba baserak. Urang nan datang 'pai makan' biasono indak musti sarangkek-sarangkek, nan datang-datang juo, nan alah sudah salasai makan buliah pai maninggaan rumah urang baralek. Si pangka mameloki jamba baserak cako satiok kali sarombongan tamu pai sasudah salasai makan. Samba nan alah bakeh diambiak tamu sabalunno dibao ka balakang, ditambah atau diganti baliak piriangno. Katiko datang baralek sarupo iko jarang urang nan makan bajamba, jadi makan di piriang surang-surang. Caro duduak pun samo duduak sajo laki-laki jo padusi, paliang-paliang agak dipisah-an sajo saketek antaro rombongan apak-apak jo rombongan induak-induak tu. Nan datang sabagai tamu tantu tatap musti bataratik katiko makan. Duduak baselo, makan kulimek-kulimek, indak barimah, indak jambak-jambau maambiak samba nan juah dari tampek awak duduak, indak mancapak-capak, indak manyingajo manyisoan nasi di piriang. Baitulah adab makan nan dibiasokan urang, di kampuang.

     Urang-urang padusi nan datang pai makan indak mambao kado, tapi mambao bareh di dalam kaduik atau kampia. Urang laki-laki biasono malenggang sajo. Kok tadunsanak bana, basalam tempe saketek biko katiko ka pai, tapi itupun jarang pulo. Alah agak kudian-kudian saketek, dek tamu nan datang ado nan kawan kanti satampek bakarajo, mako di antaro tamu muloi ado nan mambao kado. Acok kali kadoko paralatan pacah balah, galeh salusin (dalam kotak),atau piriang salusin, atau cangkia jo tadah agak salusin dsb, dsb. Sainggo sasudah baralek amuah panuah lo biliak ciek jo barang pacah balah batumpuak-tumpuak. Kini di kota ataupun di kampuang urang mangiriman kartu undangan. Alek biasono sakali jadi, bahkan dalam jangko wakatu (jam) nan ditantuan. Urang kini indak amuah lai mangarajoan alek baunyai-unyai, baabih hari, sabab indak praktis. Di kota urang baralek biasono di gaduang partamuan. Disiko adab makan manjadi 'marosot', sabab urang makan sambia tagak.

     Antah nan maa - nan maa nan ka elok.


NAN KA AMPEK
     Adab makan ko rupono iyo balain antaro ciek tampaik jo tampaik lain. Balain bagi surang urang jo urang lain. Nan di sabagian urang biaso-biaso sajo, amuah manjijikkan dek nan lain. Sarupo mampakumua ayia minum, atau mancukia gigi sasudah makan. 'Mampakumua' ayia minum, asa jan talampau 'demonstratif' bana (sarupo katiko sudah manggosok gigi), mungkin memang iyo ado paraluno, untuak 'maanyuikkan' makanan nan tasangkuik antah dimaa-dimaa di dalam muncuang. Sainggo kalau ka dikarajoan juo musti jo caro haluih, basilambek, untuak indak manjadi paratian urang nan samo duduak. Baitu juo mancukia gigi, iko indak monopoli di rumah makan Padang sin do, di restoran di hotel babintangpun tusuak gigiko ado disadioan urang. Cuma teknik mancukia gigi tantu musti haluih. Biasono mancukia gigitu sambia batutuik muncuang jo tangan kida, labiah haluih pulo lai ditutuik jo serbet atau tissue, supayo indak tampak di urang nan di'tukiangi' tu. Sudahtu, kok basuono, kalua-an jo sopan atau jo haluih ka serbet atau ka tissue. Jadi indak di'hambuihan' ka piriang bakeh awak do, itu tantu indak sandereh nampak di urang.

     Contoh lain nan dapek manjadian sabagian urang salah persepsi adolah makan manyuok jo tangan. Urang awak, baitu pulo umumno urang Malayu tamasuak jourang Malayu di Tanah Semenanjuang, sangaik tabiaso makan manyuok jo tangan. Indak mamakai sendok jo garapu doh. Di awak ado tampek basuah, 'kabasuah', 'kobokan' untuak tampek mambasuah tangan baiak sabalun makan maupun sasudah makan. Di Malaysia ado cerek khusus, jo panci khusus balubang-lubang tampek manampuang ayia pambasuah tangan nan dituangan dari cerek pambasuah tangantu. Samantaro urang ado nan 'jajok' bana mancaliak awak manyuok jo tanganko. Konon, inyiak Haji Agus Salim, di suatu parjamuan di nagari Bulando dicimeeh-an dek surang urang Bulando katiko baliau manyuok jo tangan ko. Kecek si Bulando ko, 'Mancaliak caro angku makan, nampakno iyo alun patuik nagari angku mardeka lai do. Angku makan sarupo urang primitif makan,' jano. Aa jawek inyiak Haji Agus Salim. 'Lai tau angku alah bara banyak muncuang urang nan ditampuahno di sendok nan angku pakai tu? Lai tau angku apo-apo sajo panyakik tiok urang nan alah panah mamakai sendok tu? Samantaro tangan amboko iyo surang ambo sin nan mampagunoan untuak makan, alun ado urang lain lai doh. Dan ambo tau bana nilai kabarasiahanno.' Ndak pandai mangecek si Bulando tu lai jadino. Namun baitu antaro sasamo awakpun kadang-kadang nampak juo nan dikarajoan urang lain dakek awak agak 'mangganjia'. Sakali wakatu ambo makan jo kawan-kawan di restoran hotel. Dek kabatulan makan jo gulai ikan, jo samba lado, dan kabatulan kami sameja adolah urang nan biaso makan pakai tangan kasadono, kami katapianlah sendok jo garapu, kami mintak 'kobokan'. Cepak cepong kami makan. Sasudah makan, sasudah mambasuah tangan saketek jo 'kobokan' ambo tagak, pai mambasuah tangan ka 'wastafel'. Surang kawan ambo, sasudah mambasuah tanganno di kobokan, lalu manyiram tanganno jo ayia minum dari galeh nan dituanganno ka piriang. Walaupun di ambo indak aneh bana pamandangan tu, tapi di kawan ambo urang Sunda, tabulancik matono mancaliak. 'Baa mangko disinan jo caro sarupo itu ang mambasuah tangan, indak pai sin ka kran di sampiang sinan? Aa iyolah sabana jorok ang,' jano.

     Di ambo nan sangaik indak suko bana mancaliak urang makan basiso. Biasono dek akok, dek gadang mato pado paruik, mako sampai makan basiso. Di tampek urang baralek mancaliak nan sarupo itu, 'babulu' mato ambo, tapi aa nan kadisabuik. Panah ambo basuo jo urang nan singajo bana manyisoan nasi dipiriangno sasudah makan. Bukan nasi rimah-rimah, tapi masih saparampek piriang, di tutuikno jo tampek basuah, di basuahno tanganno. Ambo tanyoan,baa mangko disisoan nasi sabanyaktu? Baa jano, itu rasaki taranak, buliah diagiah-an ka ayam atau ka kuciang. Jaleh itu bukan jawaban. Jaleh pulobahaso kabiasoan sarupo itu sangaik indak elok, mubazia.


NAN KA LIMO
     Di kampuang saisuak, kami makan di rumah dapua, baitu kami sabuik bagianrumah dakek ka dapua tu. Di lapiak nan bakambangan di sinan, duduak malingka maadok-i 'juadah' makanan. Paliang kurang sakali saari, biasono patang ari kami makan basamo di rumah dapua ko. Kami anak laki-laki, kadang-kadang duduak baselo, kadang-kadang duduak jo lutuik suok tagak. Duduak nan tarakhirko indak dibangihi bagai dek enek kami doh. Lah kini-kini ambo tau bahaso adab makan Rasulullah Shallallahu 'alaihi wa sallam adolah sarupo itu, walaupun ado ustad nan bapandapek duduak sarupo itu tidaklah marupokan sunah Rasulullah tapi kabiasoan masyarakat Arab maso itu.

      Ruang gadang di tangah rumah dipakai tampek makan kalau ado urang baralek, atau kalau ado tamu tibo. Alah ado juo meja makan di rumah urang gaek ambo ko sajak ambo tau, tapi kami pagunoan untuak tampaik baraja, bukan untuak tampaik makan.

      Makan basamo-samo nan bukan katiko baralek, dan bukan pulo di rumah adolah makan katiko urang mairiak. Mukasuikno makan di sawah. Disiko indak sitereng bana taratik lai doh, indak pakai pasambahan bagai doh. Makan basarigia-sarigia, kadang-kadang antaro mamak jo kamanakan. Kadang-kadang bajuntai di pimatang sawah. Di ari mairiak, pukuah satangah sapuluah tibo urang padusi maantaan kawa, mambaoan katan jo sanok (kolak) pisang. Juadahtu di bao dalam katidiang nan dijujuang di kapalo. Cerek ayia bajenjeng ditangan. Katiko ketek-ketek bana, alun sato bagai lai ambo mairiak, masih manapek-i juo ambo minum aia daun kopi basangai atau nan kami sabuik daun kawa. Tampaik minumno di sayak nan alah bakikih haluih. Mandakeki wakatu luhua, tibo pulo urang maantaan nasi. Biasono katiko itu mairiak alah salasai atau ampia salasai. Kamipun makan. Itulah maso dimaa urang alun 'tapitih' lai doh. Urang nan sato mairiak tu indak surang juo nan baupah doh. Dan nan datang mairiak di sawah katiko itu bukan surang duo urang tapi amuah sampai duo puluah urang. Tagantuang dari kaelok-an pargaulan urang nan punyo sawah, dan biasono pargaulan urang katiko itu elok-elok sangaik, mako mairiak ko baganti ari antaro sawah nan ciek ka nan lain. Ariko di sawah Tan Barain, bisuak di sawah Mak Tan Kudun, sudah tu di sawah Mak Dang, baitu sin taruih.

     Makan duduak di kurisi basuono hanyolah di lapau atau kadai nasi. Makan nasi Kapau malahan duduak di bangku-bangku randah. Urang awak kan santiang babaso-basi. Nan di adokino nasi ramaih sapiriang, tapi urang salapau dipabasoanno. 'Samo makan sin wak mak, tuan, angku, mando.......' Pokokno kasalapauanno di angguakno. Baitu taratik urang katiko itu. Makan di lapau ko tantu di pasa atau di pakan sabab di sinan nan ado lapau nasi. Kalau dilapau kopi si Tamburin di kampuang indak ado disadioanno nasi doh.

     Mungkin dek pangaruah 'kamajuan' atau pangaruah pargaulan jo urang di lua kampuang awak, kini makan duduak baselo di lapiak iyolah sakali-sakali bana dikarajoan urang. Tamasuak dek diri ambo. Kini awak makan duduak di kurisi maadoki meja makan. Di rumah ambo, kami makan umumno manyuok pakai tangan. Sakali-sakali bana pakai sendok jo garapu, sakali-sakali bana pakai 'sumpit', sakali-sakali bana pakai pisau jo garapu. Baa mangko nan lain-lainko sakali-sakali bana? Sabab iyo indak ado nan ka salamak makan manyuok pakai tangan tu doh. Dan sakali-sakali bana kami makan bajamba maadoki piriang gadang (nan saari-ari jadi 'pajangan') duduak di lapiak, balimo baranak. Sambia anak-anak ambo tasanyum-sanyum.

     Sainggo iko pulolah daulu carito 'Adab makan' nan mungkin indak atau kurang 'nyambung' ko.

Penulis M.D. Saib Lembang Alam