Ketek Banamo Gadang Bagala

     Sia nan masih juo lai kini mamakai gala nan samparono gala salain mak Marah di Pakan Ladang? Di Padang Panjang mak Syukur nan manggaleh sate sajak taun 1941 indak tau urang sia gala baliau? Baitu juo mak Adjaik, antah sia pulo gala liau. Jaan an nan bagala biaso-biaso, pangulu atau labiah tapekno Datuak sin kini alah banyak nan maleh manyandang gala adaik. Pak Baharuddin Datuak Batungkek Ameh lai disapo urang juo angku Datuak kalau di kampuang walau indak banyak nan apa gala baliau sacaro utuah, namun di kantua baliau di Padang labiah banyak urang manganal baliau jo pak Bahar, namo baliau nan alah tapakai sajak sabalun baliau diangkek jadi pangulu. Padohal alah rabah bana kabau sikua panagak-an gala pusako tu.

     Adaik dilakek-an juo katiko paralu. Bapantang awak indak ka mamakai baju gadang, langkok jo deta jo sisampiang, sarato karih tasisik di ari awak baralek baradaik. Tapi ari baralek baradaikko indak kalabiah pado sahari duo. Tiok anak kamanakan awak pai babinyi dilewakan juo galano untuak di imbauan di medan nan bapaneh, dilabuah nan golong, di pasa nan rami. Gala tu baitu juo. Sutan Lembang Alam, Sutan Saidi Alamsyah, Sutan Panduko Rajo. Kamanakan cako, nan gadang di rantau, nan babahaso Minang sin indak pandai, tasanyum-sanyum sajo mangamek. Katiko mintuo nan iyo pulo agak pagarah, maimbau jo gala nan alah dilewakan cako di gaduang tampek resepsi, Sutan Palito Alam, indak kunjuang manyauikno, indak tauno nan itu galano.

     Dek gala alah kailangan pasa ko mungkin, nak supayo baliak maruahno baliak, dicubo mang go public kan gala. Diterai (iko asa katono ‘try’) maagiahan ka urang lain. Dima bulo kasalahno. Dek gala sakadar gala sajo indak kalakek bagai doh. Pabilo pulo urang ka manyampaian sambah ka Amien Rais Bergelar Tuanku Penghulu Alam Nan Sati. Paliang-paliang kini, sapakan sasudah baralek, urang nan maagiah jo urang nan diagiah gala alah samo-samo lupo jo galatu. Tinggaawak nan heboh sudah itu.

     Wassalamu'alaikum wr.wb.,

Penulis M.D. Saib Lembang Alam