Arago Rupiah

NAN PARTAMO
     Katiko ambo ketek baumua tujuah taun, duduak di kalas satu SR (Sekolah Rakyat) di tahun 1958, kadang-kadang ado juo kami dapek ‘uang jajan’, pitih balanjo namono di kami. Ambo kecekan kadang-kadang, sabab di kami katiko itu indak musti bana dapek pitih balanjo tu tiok ari doh. Balanjo ko kadang-kadang ciek tali, kadang-kadang sasuku. (ciek tali = 25 sen, sasuku = 50 sen). Uang tali, uang ketip (sapuluah sen) jo uang kelip (limo sen) sampai uang sen bana tabuek dari aluminium, samantaro uang suku, bagambar Pangeran Diponegoro, tabuek dari tambago, ukuran gadangno agak ketek dari uang tali. Ciek talitu kalau dibaliaan ka karupuak Batuampa, karupuak putiah taba dari kapelo, sagadang tutuik kaleng (10 senti diameterlah kiro-kiro), dapek ampek buah. Nan agak pancimeeh mangecekan karupuak ‘pacahan kaco’, sabab mangunyahno sabana heboh, badarak-darak tapi dek kami lamak bana taraso. Pitih ciek talitu amuah juo dibalikan ka gulo-gulo tareh, gulo-gulo saka sagadang pituluik, bamasuakan katapuang kapelo pulo agakno, bisa pulo dapek ampek buah. Balanjo kami nan lain bisa juo bubua samba, bakuah sayua atau kuah cubadak, ikopun dapek juo dikandakan ciek tali.

     Duo atau tigo taun kudian arago karupuak cako alah barubah jauah. Parubahantu tajadi baransua-ansua. Sabagai anak-anak ketek katiko itu kami indak panah maraso hirau bagai jo arago pitih nan sarupo itu. Ado kawan di adiak ambo nan biaso mangecekan (katiko di jaman no pulo) kalau mintak pitih balanjo ka urang gaekno, nan bahaso limo rupiah baru sadang elok sabab, ‘karupuak ciek, pisang ciek itu saringgik tuh.’ Di kami badunsanak-dunsanak sampai kini kadang-kadang jadi garah, ‘katiko ang kalas duo bara karupuak ciek?’, sabab aragono bisa-bisa 4 ciek tali (di jaman ambo), duo saringgik dijaman adiak ambo duo-tigo tahun kudian, bisa duo saratuih sasudah itu pulo.

     Katiko ambo kalas ampek, guru maaja jo mancotokan supayo kami rajin manabuang, manyimpan pitih jo caro nan agak maju, dimasuakkan ka tabungan pos. Pos katiko itu, maadoan tabuangan murik, jo tando tabuangan sarupo parangko nan ditempekan ka buku tabungan. Arago tando tabuangan ko ado nan ciek rupiah, ado nan saringgik. Ciek buku atau labiah tapek karatu tabungan tu punyo kotak-kotak untuak 40 ‘parangko’ cako. Dek karano guru nan manyuruah, kalau dapek pitih basumangaik bana kami mambali ‘parangko’ tando tabuangan tu. Ado kawan nan panuah dino duo buku, dan nan dibalino banyak nan saarago saringgik. Nan takana diambo, mulono dikecekan nan bahaso kalau kartu tabuangan itu alah panuah kaditukai jo buku tabungan nan sabanano, indak pakai parangko itu lai. Tapi antah dima garan salahno, iyo indak ado kami nan sampai manukai jo buku tabungan asli tu doh. Katiko ambo alah kalas anam, kok dapek banapun ditukai baliak jo pitih, isi tabungan baparangko nan sakitar 75 rupiah tu, indak cukuik lai pambali duo buah karupuak Batuampa.

     Taun-taun 60an tu iduik iyo agak sarik, talabiah-labiah di nagari awak nan baru ‘kalah parang’, samantaro pak parasiden awak nan partamu katiko itu agak kadodoran mauruih ekonomi, tapi tageh jo slogan-slogan nan macam-macam bunyino. Ado nan ‘vivere veri coloso’, antah aa garan aratino, tapi dicimeehan urang jo ‘abih bareh makan kapelo’. Ado nan ‘mana dadamu, ini dadaku’, mukasuikno manyarempeang, tapi antah kasia. Ado nan ‘ganyang Malaysia’ sabab ‘awak’ bamusuah bana katiko itu jo Malaysia nan dianggap negara boneka Inggirih. Tapi nan jaleh bana, iduik dari saari kasaari batambah sulik, urang antri mambali minyak tanah, antri mambali bareh. Samantaro gaji pagawai nagari katiko itu manuruik istilah apak si Enri kawan ambo hanyo cukuik pambali duo kilo gulo.


NAN KADUO
     Sasarik-sarik iduik, sa ’vivere veri coloso’ no bana Bung Karno katiko itu, alhamdulillah kami lai siaik juo. Mungkin dek iduik di kampuang, makan padi taranak, jo sayua pucuak kapelo dari alaman balakang, ikan dipapeh di tabek balakang pulo, atau kalau indak kami (paja-paja ketek katiko itu) taankan papeh sanjo ari di pamatang sawah, ditantui pagi subuah dapek dek kami baluik sawah. Bialah indak kabanyak bana ayam lai pulo batalua ciek jo duo. Bialah tapaso antri bana mambali minyak tanah, pamakaian minyak tanah indaklah banyak bana, paliang-paliang paiduiki lampu togok. Untuak mamasak didapua urang tuo kami biasono mampagunoan kayu api. Kayu apiko dibao urang sababan-sababan gadang dari arah gunuang Marapi, dipajua balian urang jo bareh. Ado nan aragono tigo liter, ampek liter bareh. (Saliter di urang kampuangko, by mistake adolah satangah liter nan sabanano).

     Batambah laruik taun, batambah juo arago rupiah nan jadi pokok carito kitoko malayang-layang. Puncakno tajadi katiko dipangujuang taun 65 pitih dipaketek, nan saribu jadi ciek rupiah. Nan ciek rupiahko untuak samantaro di agiah ‘embel-embel’ ‘baru’, ciek rupiah baru nan samo jo saribu rupiah lamo. Kaduono samo bajalan, samo dipakai untuak samantaro gadang. Jadi bisa sajo awak mambaia ciek rupiah (baru) disonsong urang 500 rupiah (lamo). Rupiah baruko mulo-mulo tadiri dari pacahan ciek rupiah, saringgik, limo rupiah, sapuluah rupiah, duo puluah limo rupiah. Kasadoanno bagambar Sukarno. Ado juo uang karateh sasuku (50 sen) jo ciek tali (25 sen) nan bagambar tentara sukarelawan. Nan sapuluah sen jo limo sen indak takana diambo. Tantu ado harusno, tapi nilaino indak amuah diasuah lai. Baa mangko pitih kaciak-kaciak ko uang karateh pulo? Sabab katiko itu uang logam alah indak bapakai lai doh.

     Pitih baru bagandiang jo pitih lamotu lai indak lamo-lamo bana doh sabab nan lamo di ilangkan dari paredaran sacaro baransua-ansua. Namun nan pitih barupun indak juo amuah badagok, sabab indak lamo bagai urang baretong jo ciek piah duo rupiah doh, lah baransua pulo naik jo luah-luah (sapuluah-sapuluah) sudah itu jo tuih-tuih (saratuih-saratuih) baliak. Tapi lai juo talalui sabanta, karupuak Batuampa baarago 2 buah pulo ciek tali (uang baru) atau duo ratuih limo puluah rupiah uang lamo.


NAN KA TIGO
     Katiko ambo barangkek ka Banduang, sudah itu tingga bana disinan di tahun 70, untuak iduik sabagai mahasiswa sacaro sederhana ambo dapek kirinan 3000 rupiah sabulan. Tingga manompang jo kakak sapupu, aratino indak tamasuak pitih 3000 tu untuak mambaia seo rumah doh. Kalau dietong jo dolar, pitih sakitu itu samo jo 8 dolar Amerika. Baa mangko tau pulo ambo jo kurs dolar bagai? Sabab katiko mamambaia uang masuak ka ITB, ambo dapek kiriman dari kakak ambo nan katiko itu sadang di Amrik sabanyak 50 dolar, dijadian rupiah jadi 18000, ‘laweh’ sangaik pitih sakitu katiko itu. (sadolar samo jo 360 rupiah.)

     Rupiah nan lumayan stabiltu agak panjang juo umuano sabab, dolar dikabek aragono 360 rupiah tu dalam wakatu nan cukuik lamo. Katiko ambo mulo-mulo mancubo makan gaji di taun 75, gaji ambo 90000, santiang bana rasono katiko itu. Sewo kapatabang (lah santiang, lah tau jo sewo kapatabang bagai) ka Padang katiko itu 25000. Sasudah tahun 75, (atau mungkin taun 74, sasudah paristiwa Malari) urang muloi babisiak-bisiak, nan bahaso Suharto lah tau dipitih, bahaso anak-anak buahno lah banyak nan suko dan main pitih. Taun 77 eboh jo kasus Pertamina nan kadodoran dek bisnis Pertamina talampau banyak amek. Buntuikno Dirut Pertamina katiko itu Ibnu Sutowo baranti. Taun itu pulo urang muloi labiah barani mangecekan nan bahaso Suharto jo urang-urang dakekno lah muloi pasang tarif dalam babisnis, kalau indak salah ado majalah Newsweek katiko itu mamuek artikel jo judul ‘Indonesia, the fading hope’. Taun 78 pamarintah Suharto mandevaluasi rupiah, dolar nan samo jo 360 tadi batuka jadi 480. Rakyaik badarai indak mangarati amek jo urusan devaluasitu lai doh.

     Tapi mahasiswa, tarutamu nan di Banduang katiko itu mampalopori malawan ka Suharto jo demo-demo. Suharto main kayu, mahasiswa nan pambangkang ditangkokino, kampus diduduiki tantara, dan sajak itu pulo dibuekno paraturan NKK (normalisasi keadaan atau keamanan kampus) mambuek mahasiswa indak bakutiak lai. Suharto batambah basimaharajolelo (cuma indak diagiah gala adaik dek urang Minang jadi sutan marajolelo). Bisnis anak-anak no muloi tarang-tarangan. Mako pitihpun baransua-ransua pulo taoco baliak aragono walaupun masih basilambek. Suharto mandevaluasi pitih pulo baliak duo kali sasudah itu, tahun 83 katiko sadolar jadi 625, sudah tu taun 86 katiko dolar jadi 900an dan sudah itu dipabiaan mangambang terkendali istilahno. Mako marayok-rayoklah arago pitihtu ‘sedikit-sedikit lama-lama menjadi bukit’ sampai mancapai 2300 ditaun 97. Taun 97 alah samo takana diawak, tajadi ‘krismon’ atau karisis moneter, nan taruih manaruih karisis sampai kini. Puncakno panah dolar nan santiangtu baarago sampai 17000 rupiah ditaun 98 sasudah Suharto jatuah.

     Kalau dibandiangan jo pitih urang, iyo malu awak jo rupiah ko. Taun 80, ambo dikirim kantua pai kurusuih ka Singapur, manginap di Hotel Malaysia (kini Boulevard hotel) katiko itu samalam tabaia 60 dolar Singapur. Ciek dolar Singapur tu samo jo 220 rupiah katiko itu, jadi ongkoih manginaptu samo jo 13000 rupiah kiro-kiro. Kini tarif hotel tu 140 dólar Singapur, (2.5x lipek pitih urang ) tapi samo jo 800,000 pitih awak (labiah dari 60x lipek).

     Baitu juo kalau ka dipakai untuak pai naiak haji, indak amuah rupiah ko diandok-an doh sabab indak tanang awak dek aragono tu. Urang awak biasono maandokan pitih jo manyimpan ameh (rupiah ameh).

     Sakitulah carito parami-ramian lapau.

Penulis M.D. Saib Lembang Alam